دموع معلم

من طرف **Boss** الثلاثاء يوليو 12, 2011 11:25 am

يا عم قوم للمعلم ولاَّ ماتقُمشى
ما عادتش تفرق خلاص كله بقى بيمشى
إن قلت صاحب فلوس الكل قام حياك
وإن قلت صاحب علوم قالوا: ما يحكمشى

زمن المعلم خلاص يا صاحبى ولىّ وراح
عايش حياته فى ألم ما بين دموع وجراح
صاحب الرسالة العظيمة دنيته معنداه
شايل هموم البشر عمره فى يوم ما ارتاح

راح الزمان الجميل زمن الوفاء والحب
أيام ما كان المعلم هُو نبض القلب
وكان له هيبة وصوته ع الدوام مسموع
وكان ضمير أمته كان هو صوت الشعب

راح الزمان الجميل وماعدش فيه أحباب
سكن الطمع فى القلوب والحب عنها غاب
وبقى المعلم وحيدًا يقرأ ومين يسمع؟
فى دنيا صبحت سويقة وف زمن كداب

عملوله كادر عشان العدل والإنصاف
وقالوا: حيعيش فى جنة والنعيم أصناف
أتاريه شرك واتنصب علشان يغموا عنيه
وعلى رقبته يحطوا سُتّميتْ سياف

وعشان تتم الخديعة ويلحسوا اللى قالوه
قالوا: يؤدى إمتحانًا من كام سؤال طبخوه
ونتيجته دايمًا رسوب مهما كتب أو قال
أصل الحكاية ياعمى قصدهم يهينوه

يا عينى ابكى على الوعد وع المكتوب
ودنيا فيها كل شىء بقى ماشى بالمقلوب
فيها المعلم وحيد فى وسط ناسه غريب
صابر وصبره يا عين غطى على أيوب

يا عينى إبكِ وع الزمن الجميل نوحى
يمكن دموعك يا عين تروى عطش روحى
وتكون أنيسًا للمعلم فى غربته تواسيه
يمكن تكون الدوا يا عين لجروحى