انت المهدى وجمال المنتظر

من طرف Sara الثلاثاء نوفمبر 30, 2010 8:18 am

ما انت اللى حاربت وانت اللى انتصرت
وانت المهدى وجمال المنتظر
احنا احنا القضاء والقدر
متشغلش نفسك بينا
يعنى ايه شعب؟
يعنى شوية حجر
على شوية شجر
تقدر تقول سيادتك
شوية بقر
احنا ياريس احنا حصانك
احنا مخلوقين عشانك
اوعى تفكر فينا ولا تشغل بالك
اغسل ايديك مننا
احنا ذنبنا على جنبنا
احنا مين احنا
علشان تتكلم عننا
وكتر الف خيرك
ايه يعنى لما تجيب جمال
وايه يعنى لما تحبس العيال
وايه يعنى لما تركبنا ونقول كمان
قال مش عجبهم المحاكم العسكرية
وبيطلبوا بالديمقرطية
طيب ما احنا شعب غشيم
واللى بيفهم فينا بهيم
ما انت ياريس صاحب الطلعتين
الطلعة الجوية والطلعة البهية
وفيها ايه لما تعدل الدستور
وفيها ايه لما يضيع عمرنا فى طابور
وفيها ايه طب ما احلى بنى ادم من الشعب
ان راح ولا جه طنبور
وايه يعنى لما تسيطر على الجوامع والجامعات
وايه يعنى انتخابات ومعدش فاضل كمان الا المحليات
وايه يعنى لما تعاقب القضاة
معاك انت النجاة
وايه يعنى صفر المنديال
وايه يعنى حقوق انسان
وايه يعنى لما تحبس الاخوان
وايه يعنى لما تعين المعيد والعميد
طب ما الناس اسياد وعبيد
وايه يعنى لما تكوينى بالحديد
دا حتى جسمنا ايربرب ويزيد
وايه يعنى لما تحبس الصحافين
مهما فى الاصل شوية كدابين
وايه يعنى لما تعوس وش الشعب طين
وايه يعنى لما تدفنا واحنا عايشين
وايه يعنى تلفيق التهم وايه يعنى معتقلين
وايه يعنى لما فى المطار اول كلمة تنقال
المصريين على جنب
المصرى راح ولا جه ابن كلب
وايه يعنى بلد بتتسرق
وايه يعنى بلد بتتحرق
وايه يعنى كام عمارة بتقع
وايه يعنى كام الف مشروع فشل
وايه يعنى لو الشعب انتحر
وايه يعنى خطط خمسية
وايه يعنى جامعة ويعني ايه ثانوية
ويعنى ايه من الاساس تعليم
دا مهما يتعلم ايطلع بهيم
ربنا يخليك لمصر
انت رمز النصر
سيبك من المعارضين
وجرايد المستقلين
ولا اقولك ياريس حطهم فى الحبس
مين اللى قال ان احنا سبع تلاف سنة حضارة
طب فين الامارة
مين اللى قال ان احنا عندنا
هرم ونيل
انت ياريس انت الاول وانت الاخير
وفيها ايه لما تلعب
جوالف ولا اسكواش
طب ما الشعب بياكل ببلاش
شعب مقرف صحيح
شعب ما يختيشيش
قال ايه عايز يعيش
وفيها ايه لما نوصلوا الغاز لحد تل ابيب
لمدة عشرين سنة وزيادة
دا يوم الهنا
وايه يعنى لما يبقى رخيص حبتين
كويس انهم رضوا هو احنا كنا نحلموا
ومعدش فاضل الا شوية الاعتصامات
والاضرابات وقال ايه بيعملوا مظاهرات
دول شوية عيال خارجين عن القوانين
والبلد تمانين مليون ودول الف ولا الفين
شوية عيال زبالة
عايزين يعملوا فى البلد حالة
وان راحوا ولاجم حشرات
حكمتك يا ريس معاهم استحملتهم ساعات
وكتر خيرك
وفى الاول والاخر الكل يتمنى رضاك
ياريس اللى تحت ارضك
واللى فوق سماك
وكل الشعب يطلع ينزل
يعيش يموت بيهواك
وايه يعنى لما يبقى مهندس
قاعد ببطتين فى السوق
وايه يعنى لما يبقى مدرس
شغال على توك توك بيسوق
وايه يعنى لما الشعب يأكل طوب
وايه يعنى لما يبقى الشعب على امرة مغلوب
انت ياريس اللى طلعتنا من المنعطف للمنحنى
وعلى رايك كنا فين وبقينا فين
وكيف كنا وكيف اصبحنا
كنا قاعدين على المصطبة بنمصوا قصب
دلوقتى لسة قاعدين بس بنمصوا حطب
وايه يعنى لما يبقى فيه واحد عنده
كام الف فدان
وواحد تانى بيدور على قالب طوب
يحطه تحت راسه علشان ينام
وايه يعنى لما يبقى فيه كام مليون حكم قضائى
بضبط واحضار
يسبوهم ويحبسوا ناس تانيه
معلهاش احكام
وايه يعنى لما النصب زاد
وايه يعنى لما ينتشر الفساد
بطول وعرض البلاد
وايه يعنى لما يبقى الظلم عدل
والعدل ظلم
وقال بيقولوا ازاى المسئول ينام
ومعدش كمان اللى محدودين الدخل
ومعدومين الدخل واللى عايشين فى الوحل
واللى عايشين فى الترب
بيقولوا اتناشر مليون
انشالله يكونوا تلاتين
دول مش عايزين غير ضرب الصرم
ولاد الكلب ملوا البلد
وايه يعنى لما يبقى فيه اتنين مليون اطفال شوارع
طب وعاوزين الحكومة تعملهم ايه
ولا توديهم فين
طب دول عارفوا طريقهم
انتم طريقكم فين
بتتكلموا وخلاص وكلامكم ملوش اساس
واقفين تعرضوا وقاعدين تعرضوا
وتلاقيكم كمان نايمين بالعرض
علشان لما تصحوا تعرضوا وخلاص
ما قلنا الف مرة كلامكم ملوش اساس
انا مش عارف معارضة دى ولا لحمة راس
وقال مش عجبهم الامن المركزى
ولا الامن القومى ولا البحث الجنائى
ولا الامن الغذائى ولا سجن المطار
امال ايمشى ازاى النظام
انت ياريس انت صاحب القرار
انت اللى تخلى الليل ليل والنهار نهار
انت النقطة المركزية فى الكرة الارضية
انت الاسد المغوار
وايه يعنى لما يبقى عندنا كل كام شهر كام قتيل
على الحدود مع اسرائيل
طب ما دى طبيعة الحدود
مش المشكلة فى الاسرائيلين
المشكلة فى الناس اللى قاعدين على الحدود
ولا عايزين نعملوا زاى بتاع ايران وحزب الله
وكل شوية نقولوا
دولة اسرائيل ملهاش وجود
مش بينا معاهدات واتفاقيات
نموتوا احنا وهما يبنوا مستوطنات
وايه يعنى لما المعبر يتقفل ويتفتح بامر من اسرائيل
انتم هبل امال عايزين الامر من مين
دا الحمد لله انهم سيبنا عايشين
وكفايه قوى انهم ما بيعاملناش زى ما بيعاملوا الفلسطينين
وايه يعنى امين شرطة
وفيها ايه لما يضربك على قفاك
امال انت مفكر القفى معمول ليه
علشان ياخد مقاس ايديه
امال ايه
افهم يا بجم اعرف الحكايه ايه
اوعى مهما يبهدلك ولا يضربك
تتهبل وترد عليه؟؟؟؟؟؟؟؟؟؟؟؟